Azərbaycan, Bakı, 27 yanvar /Trend, müxbir N.İsmayılova/
Asiya İnkişaf Bankı (AİB) Azərbaycanda su təchizatı və sanitar xidmətləri sisteminin yaxşılaşdırılması üzrə multitranş paketin üçüncü tranşı çərçivəsində maliyyələşmənin əhatə edəcəyi rayonları müəyyənləşdirib. Bu barədə şənbə günü Trend-ə AİB-in Bakı ofisindən məlumat veriblər.
"Üçüncü tranş çərçivəsində Ağcabədi və Beyləqanda su təchizatı və kanalizasiya sisteminin yaxşılaşdırılması üzrə işlərin aparılması planlaşdırılır. Bundan başqa, bu tranş çərçivəsində Naxçıvanda bankın vaxtında başa çatdıra bilməyəcəyi işlərin aparılacağı da mümkündür", - bankdan deyiblər.
"Bank 175 milyon dollar həcmində üçüncü tranşı 2012-ci il noyabrın 3-də təsdiqləməyi planlaşdırır", - AİB-in şənbə günü saytında yerləşdirilən məlumatda qeyd edilir.
İlin əvvəlində 300 milyon dollar həcmində təsdiqlənən ikinci tranş çərçivəsində vəsaitlər Ağdaş, Göyçay, Naxçıvan və Beyləqanda su təchizatı və kanalizasiya sisteminin yaxşılaşdırılması çərçivəsində işlərin başa çatdırılmasına yönəldiləcək.
Bu gün AİB Azərbaycanda su təchizatı və sanitar xidmətlər sisteminin yaxşılaşdırılması üzrə iki layihəni maliyyələşdirir. Ümumi dəyəri 39,9 milyon dollar layihənin 30 milyon dollar məbləğində birinci krediti 2004-cü ildə Göyçay və Naxçıvanda su təchizatı sisteminin bərpasına ayrılıb. Layihənin həyata keçirilmə müddəti 30 iyun 2011-ci ildə başa çatıb.
Beş il əvvəl təsdiqlənmiş layihənin bahalaşması və həmin rayonlarda işləri tam əhatə etməsi ilə əlaqədar MFF vəsaitləri hesabına 75 milyon dollar (birinci tranş), Azərbaycan hökuməti tərəfindən isə 25 milyon dollar ayrılıb.
MFF 2009-cu ilin sentyabrında bankın Direktorlar Şurası tərəfindən 600 milyon dollar həcmində bəyənilib.