Azərbaycan, Bakı, 3 fevral /Trend, müxbir N.İsmayılova/
Xəzər Beynəlxalq İnvestisiya Şirkəti (CIIC) Azərbaycanın kənd təsərrüfatı sektorunda özünün dördüncü layihəsini həyata keçirmək üçün "TARLA" MMC-nin qeydiyyatı prosesini başa çatdırıb. Trende-in məlumatına görə, bu barədə ölkənin Vergilər Nazirliyinin rəsmi saytının "bir pəncərə" bölməsində deyilir.
MMC 2012-ci il yanvarın 9-da 500 min manatlıq nizamnamə kapitalı ilə qeydiyyata alınıb. Şirkətin qanuni nümayəndəsi Mahmud Cəfərovdur. Şirkətin təsisçisi CIIC-dir. Şirkətin Müşahidə Şurasının üzvləri Orxan Ağalarov, Toğrul Köçərli, Fərhad Hacınskidir.
Bir müddət əvvəl şirkətdən deyildiyi kimi, sonrakı üç il ərzində layihəyə 1,5 milyon manata yaxın vəsaitin qoyulması planlaşdırılır.
CIIC-nin nizamnamə kapitalı 31 milyon manat, əvvəllər reallaşdırılan üç layihə üzrə investisiya portfeli 16 milyon dollar təşkil edir.
"Caspian International Investment Company" 2008-ci ilin martında 2,954 milyon manatlıq ilkin kapitalla QSC kimi qeydiyyatdan keçib. AİŞ-in iştirak payı 25, ICD-nin iştirak payı isə 75 faiz təşkil edib.
Bu gün şirkətin nizamnamə kapitalı genişlənib. Şirkətin xarici investorlarına Küveytin İnvestisiya Şirkəti "Hares Group", Yəmənin İnvestisiya Şirkəti "Al Ahmar Group", Sudanın "MAM Group" şirkəti, Dubayın "TANMIYAT Group" şirkəti, eləcə də İslam İnkişaf Bankı aiddir. CIIC-nin kapitalında xarici səhmdarların iştirak payı 23 milyon manatı ötür.
Strategiyaya əsasən, CIIC-nin investisiyaları şəriət qaydalarına zidd olan spirtli içkilər və donuz əti məhsullarının istehsalı üzrə müəssisələr istisna olmaqla, iqtisadiyyatın real sektoruna, həmçinin, maliyyələşdirmə və sığorta xidmətlərinin göstərilməsində standart şərtlərlə fəaliyyət göstərən bank və sığorta təşkilatlarına qoyulacaq.
Fevralın 3-nə olan rəsmi məzənnə 0,7863 AZN/USD təşkil edir.
