Azərbaycan, Bakı, 11 fevral / Trend müxbir N.Ismayılova /
2011-ci ilin dekabr ayı ərzində Azərbaycanın bank sektorunun kapitallaşması 3,2 faiz artıb. Kapitallaşma ötən ilin əvvəlinə nisbətən 11,9 faiz artaraq 2012-ci il yanvarın birinə 2427,5 milyon manat təşkil edib. Trend-in məlumatına görə, bu barədə şənbə günü Azərbaycan Mərkəzi Bankının (AMB) statistik hesabatında qeyd edilir.
AMB-nin məlumatına görə, kapitalı 10 milyon manatdan çox olan bankların sayı dekabrın yekunları üzrə 42 ədəd təşkil edib. Bu göstərici noyabra nisbətən bir bank artaraq 2011-ci ilin əvvəli ilə müqayisədə dəyişməz qalıb. Ölkənin bütün banklarının ümumi kapital həcmində bu kateqoriyalı bankların xüsusi çəkisi noyabrda 99,4 faiz təşkil edib. Noyabrda bu rəqəm 99 faiz, ötən ilin əvvəlində isə 98,9 faiz olub.
Hazırda kapitallaşma (minimum kapital 10 milyon manat təşkil etməlidir) üzrə AMB-nin tələblərini 2 bank yerinə yetirmir. Bir bankın (xüsusi çəkisi 0,4 faiz) kapitalı 5-10 milyon manat, ikincisinin (0,2 faiz) isə 3,5-5 milyon manat çərçivəsində formalaşıb.
Fevralın 11-nə olan rəsmi məzənnə 0,7863 AZN/USD təşkil edir.
