Azərbaycan, Bakı, 13 fevral /Trend, müxbir N.İsmayılova/
Beynəlxalq Maliyyə Korporasiyası (BMK) yaxın bir neçə ay ərzində "Rabitəbank"ın kapitalına daxil olma prosesini başa çatdıracaq. Bu barədə bazar ertəsi Trend-ə koprorasiyanın Azərbaycandakı nümayəndəsi Aliyə Əzimova bildirib.
"Hazırda "Rabitəbank"la bir sıra texniki məsələlərin razılaşdırılması aparılır. Lakin biz bu prosesi 2012-ci ilin birinci yarısından gec olmayaraq başa çatdırmağı planlaşdırırıq", - Əzimova deyib.
2010-cu ilin sentyabrında "Rabitəbank" Beynəlxalq Maliyyə Korporasiyası və AYİB ilə onların Azərbaycan bankının səhmdarları sırasına daxil olması haqqında investisiya sazişi imzalayıb. Bu maliyyə institutları hər biri 12,5 faiz olmaqla 25 faiz + 1 səhmə bərabər səhmlər paketini alıblar. Sövdələşmənin ümumi məbləği 4 milyon manatdır.
Bu yaxınlarda "Rabitəbank" imtiyazlı, adlı, sənədsiz səhmlərinin emissiya prospektini yeniləyib. Nəticədə onun həcmi 5,41 milyon manatdan 5,8 milyon manata qədər artıb. Emissiyanın yerləşdirilməsi nəticəsində bankın nizamnamə kapitalı 25,166 milyon manatadək artacaq.
"Rabitəbank" 1993-cü ildən Azərbaycanda fəaliyyət göstərən kommersiya bankıdır. Bank BMK və AYİB ilə 1999-cu ildən əməkdaşlıq edir. Bankın səhmlər paketi (86,1 faiz) bu vaxtadək bankın idarə heyətinin sədri Zakir Nuriyevə məxsus olub.
"Rabitəbank" Azərbaycanda BMK-nin iştirak payını əldə edən dördüncü bank olacaq.
Fevralın 13-nə olan rəsmi məzənnə 0,7863 AZN/USD təşkil edir.
