Azərbaycan, Bakı, 20 fevral /Trend, müxbir A.Axundov/
Nizamnamə kapitalının səviyyəsi qanunvericiliyin tələblərinə cavab verməyən "Temzа" Sığorta Qrupu İngiltərə-Azərbaycan sığorta şirkəti ölkənin sığorta bazarını tərk etmək niyyətində deyil. Bu barədə bazar ertəsi günü Trend-ə şirkətin idarə heyətinin sədri Samir Mustafayev bildirib.
Şirkətin kapitalı 1 milyon manat səviyyəsindədir, halbuki Azərbaycan Maliyyə Nazirliyinin 2012-ci ilin əvvəlinə olan minimum tələbi 4 milyon manatdır. 1996-cı ildə şirkətə verilən və 2007-ci ildə yenilənən lisenziyanın fəaliyyət müddəti bu il fevralın 12-də başa çatır. 2009-cu ildə lisenziya şirkətin təşkilati-hüquqi formasının QSC-dən ASC-yə keçirilməsi ilə əlaqədar olaraq yenidən qanuniləşdirilib.
"Biz yeni lisenziyaya görə Dövlət Sığorta Nəzarəti Xidmətinə hələ müraciət etməmişik", - Mustafayev qeyd edib.
Onun sözlərinə görə, şirkətin səhmdarları hələlik kapitalın zəruri səviyyəyə yüksəldilməsi ilə bağlı yekdil fikrə gəlməyiblər.
"Səhmdarlar kapitalın yüksəldilməsi ilə bağlı hələlik yekdil fikrə gəlməyiblər. Lakin hələ vaxt var. Əgər hətta lisenziyamızın fəaliyyəti dayandırılacaqsa, zəruri tədbirlər görməyimiz üçün altı ay vaxtımız olacaq. Əgər səhmdarlar vəsait tapa bilsələr və kapitalı artırmaq qərarına gəlsələr, bütün problemlər həll olunacaq və şirkət işləməyə davam edəcək", - Mustafayev qeyd edib.
Qeyd edək ki, Britaniyanın "Glencarron Group Limited" şirkətinin iştirak payının 49 faizinə sahiblik etdiyi "Temza" Sığorta Qrupu sığorta şirkəti Azərbaycanın sığorta bazarında 1996-cı ildən fəaliyyət göstərir. Azərbaycanın iştirak payı yerli fiziki və hüquqi şəxsə (Gala Investment) məxsusdur.
Fevralın 20-nə olan rəsmi məzənnə 0,7863 AZN/USD təşkil edir.