Azərbaycan, Bakı, 20 fevral /Trend, müxbir N.İsmayılova/
Fevralın 1-nə olan vəziyyətə görə, Azərbaycanda rəsmi olaraq 38,6 min nəfər işsiz kimi qeydiyyata alınıb ki, bunların da 42,9 faizi qadınlardır. Bu barədə bazar ertəsi Dövlət Statistika Komitəsindən məlumat verilib. Ölkədə bir vakant yerə 3 işsiz düşür.
Hesabat dövründə ölkədə əmək qabiliyyətli insanların sayı 4627,6 min nəfər təşkil edib. Bununla yanaşı, onlardan 1363,2 min nəfəri muzdlu işçidir. Bu şəxslərdən 852 min nəfər iqtisadiyyatın dövlət sektorunda, 511,2 min nəfəri isə özəl sektorda çalışır.
Muzdla işləyənlərin 21 faizi istehsal sahələrində çalışır. Onların 2,6 faizi hasilat, 5,8 faizi emal sənayesi, 5,9 faizi tikinti, 2,9 faizi kənd, meşə təsərrüfatı və balıqçılıqda çalışır. Xidmətlər sahəsində çalışanların 25,1 faizi təhsil sahəsində, 19,8 faizi avtomobil təmiri, məişət və şəxsi istifadə məhsulları, 9,9 faiz səhiyyə və sosial xidmət, 4,7 faizi nəqliyyat və anbar təsərrüfatı,1,8 faizi rabitə, 0,7 faizi daşınmaz əmlak əməliyyatları, 1,6 faizi maliyyə və sığorta fəaliyyəti, 1,1 faizi isə müxtəlif sahələrdə işləyir.
İşsizliyə görə orta müavinət 207,1 manatdır.
