Azərbaycan, Bakı, 21 fevral/Trend müxbir A.Axundov/
Azərbaycanın "Standart Insurance" sığorta şirkəti 2012-ci ildə avtonəqliyyat vasitələri sahiblərinin vətəndaş məsuliyyətinin icbari sığortası üzrə sığorta mükafatlarının 15 dəfə artımını gözləyir. Bu barədə çərşənbə axşamı Trend-ə şirkətin İdarə Heyətinin sədr müavini Aydın Rəhmanov bildirib.
"Əgər ötən il bu növ üzrə təxminən 100-200 min manat yığılıbsa, cari il yalnız mükafat məbləğinin artırılması hesabına 2-3 milyon manat yığılması planlaşdırılır" , - Rəhmanov qeyd edib.
Onun sözlərinə görə, yanvarda şirkət avtonəqliyyat vasitələri sahiblərinin vətəndaş məsuliyyətinin icbari sığortası üzrə 1,5-2 min müqavilə bağlayıb. Şirkət həmin müqavilələr üzrə 200 min manatadək vəsait toplayıb.
Şirkət ilin sonuna qədər yığımları 50-70 faiz artırmağı və təxminən 12 milyon manat yığmağı planlaşdırır.
