Azərbaycan, Bakı, 22 fevral /Trend, müxbir N.İsmayılova/
2011-ci il ərzində Azərbaycan Mərkəzi Bankı (AMB) tərəfindən 4153,2 milyon dollar həcmində valyuta sterilizasiyası həyata keçirilib. Bu barədə çərşənbə günü AMB-nin dərc etdiyi pul siyasəti icmalında deyilir.
2011-ci ilin əvvəlindən Mərkəzi Bank özünün məzənnə siyasətini yeni əməliyyat mexanizmi çərçivəsində və valyuta bazarında təklif kanallarının genişlənməsi şəraitində həyata keçirib. Lakin məzənnənin əhəmiyyətli möhkəmlənməsinin qarşısını almaq və bununla da qeyri-neft sektorunun rəqabət qabiliyyətinə neqativ təsirləri neytrallaşdırmaq üçün Mərkəzi Bank tərəfindən valyuta sterilizasiyası həyata keçirilib.
2011-ci il ərzində manatın ABŞ dollarına qarşı məzənnəsi 1,4 faiz möhkəmlənib. Milli valyutanın məzənnəsinin sabitliyi ötən il ərzində ölkədə makroiqtisadi və maliyyə sektorunun sabitliyinə müsbət təsir göstərib.
Dövr ərzində manatın nominal məzənnəsi ticarət tərəfdaşı olan ölkələrin əksəriyyətinin valyutalarına nəzərən möhkəmlənib. Manatın nominal ikitərəfli məzənnəsinin dinamikası real ikitərəfli məzənnələrin də dəyişməsinə təsir göstərib.
Hesabat dövründə manat Gürcüstan və Çinin valyutalarına nəzərən həm nominal, həm də real olaraq ucuzlaşıb. Lakin Yaponiya valyutasına nəzərən yalnız nominal, İran valyutasına nəzərən isə yalnız real olaraq ucuzlaşıb.
ABŞ, Avrozona, Böyük Britaniya, Türkiyə, Ukrayna, Rusiya, Qazaxıstan, İsrail, Cənubi Koreya və Belarus kimi ölkələrin valyutalarına nəzərən isə manat nominal və real olaraq bahalaşıb.
Hesabat dövründə qeyri-neft sektoru üzrə nominal effektiv məzənnə (ümumi ticarət dövriyyəsi üzrə) 7,1 faiz bahalaşıb. Tərəfdaş ölkələrdəki inflyasiya ilə Azərbaycandakı inflyasiya arasındakı fərq isə real effektiv məzənnəyə 1,8 faiz bəndi azaldıcı təsir göstərib. Nəticədə manatın qeyri-neft sektoru üzrə real effektiv məzənnəsi dövr ərzində 5,3 faiz bahalaşıb.