Azərbaycan, Bakı, 7 mart /Trend müxbirlər Ə.Həsənov, A.Axundov/
Azərbaycanda özəl notariusların vergiqoyma mexanizminin təkmilləşdirilməsi nəzərdə tutulur. Bu barədə çərşənbə günü Trend-ə ölkə hökumətindən bildiriblər.
"Bu dəyişikliyin Vergi Məcəlləsinə düzəlişlər layihəsinə daxil etmək planlaşdırılır. Məcəllə ölkə parlamentinə mayın 15-ə qədər təqdim edilməlidir. Vergi qanunvericiliyinə əlavə və dəyişikliklər layihəsinin hazırlanmasının bu həftənin sonuna qədər başa çatdırılması planlaşdırılır", - mənbə deyib.
Ədliyyə Nazirliyi özəl notariusların vergiqoyma məsələlərinin nizamlanması üzrə təklif hazırlayıb.
Azərbaycan Ədliyyə Nazirliyinin Qeydiyyat və Notariat baş idarəsinin rəis müavini Mehman Soltanov Trend-ə bildirib ki, nazirlik özəl notariuslar üçün vergi dərəcələrinin dəyişdirilməsini təklif edir.
"Bu təkliflərin qəbulu ölkədə özəl notariusların fəaliyyətinin genişləndirilməsinə imkan verəcək və göstərilən xidmətlərin keyfiyyətinin artırılmasına şərait yaradacaq", - Soltanov qeyd edib.
Dövlət notariusları ilə yanaşı, özəl notariusların fəaliyyətinə icazə verən "Notariat haqqında" qanun 1999-cu il noyabrın 26-da qəbul edilib və 2000-ci il yanvarın 30-da qüvvəyə minib.
Soltanovun sözlərinə görə, hazırda ölkədə 49 özəl notarius fəaliyyət göstərir, onların 32-si Bakıda, 17-si isə regionlarda işləyir.
Vergi qanunvericiliyində özəl notariuslar üçün ayrıca vergiqoyma maddəsi nəzərdə tutulmayıb.
Azərbaycan Vergilər Nazirliyindən çərşənbə günü Trend-ə bildiriblər ki, hazırda ölkədə fəaliyyət göstərən özəl notariuslara qarşı vergiqoyma zamanı müxtəlif yanaşmalar tətbiq edilir.
"Onların bir hissəsi sadələşdirilmiş mənfəət vergisi, digər bir qismi isə gəlirdən (xərclərin çıxılmasına qədər) vergi ödəyir", - nazirlikdən deyiblər.
Mənbənin sözlərinə görə, notariusların fəaliyyəti sahibkarlıq fəaliyyətinə aid deyil, buna görə də Ədliyyə Nazirliyinin layihəsinə əsasən, onların gəlirlərindən (xərclərin çıxılmasına qədər) 10 faizlik verginın tətbiqi təklif edilir.
"Notariusların gəlirlərinə göstərdikləri xidmətlərə görə ödəniş, dövlət rüsumu və digər ödənişlər aiddir və xərclərin çıxılmasına qədər onların ümumi məbləğindən 10 faizlik vergi tutulacaq" , - Vergilər Nazirliyindən deyiblər.