Azərbaycan, Bakı, 28 mart /Trend, müxbir A.Axundov/
2011-ci ilin yekunları üzrə Azərbaycanın xarici ölkələrlə həyata keçirdiyi cari transfertlərin ümumi dəyəri 3091,3 milyon dollar təşkil edib ki, bunun 60,9 faizini ölkəyə daxilolmalar təşkil edib. Trend-in məlumatına görə, bu barədə Azərbaycan Mərkəzi Bankının (AMB) saytında dərc olunmuş tədiyyə balansında deyilir.
Transfertlər üzrə ümumi daxilolmaların 94,1 faizini xarici fiziki şəxslərdən pul köçürmələri, 1,7 faizini ölkəyə idxal olunan humanitar malların dəyəri, 4,2 faizi başqa daxilolmalardır. Ümumilikdə, cari transfert əməliyyatları üzrə müsbət saldo 673,3 milyon dollar təşkil edib.
Tədiyyə balansının nəticələrinə görə, 2011-ci il ərzində ödəmələr və daxilolmalar üzrə ümumi dövriyyə 6897,3 milyon dollar təşkil edib ki, bunun 85,2 faizi (5878,6 milyon dollar) Azərbaycanın ödəmələrinin payına düşüb.
