"Bakı Sığorta"nın aktivləri cüzi artıb
Azərbaycan, Bakı, 31 mart /Trend, A.Axundov/
2011-ci ildəki fəaliyyətin yekunları üzrə Azərbaycanın "Bakı Sığorta" ASC sığorta şirkətinin aktivləri ilin əvvəlinə (11,9 milyon manat) qarşı 4,05 faiz artaraq 12,382 milyon manat təşkil edib. Trend-in məlumatına görə, bu barədə şənbə günü şirkətin rəsmi mətbuatda dərc edilən balans hesabatında deyilir.
Sığorta şirkətinin maliyyə hesabatlılığının auditini sərbəst auditor Elçin Əliyev aparıb.
2011-ci ilin sonunda şirkətin uzunmüddətli aktivləri il ərzində 9,34 faiz azalaraq 1,532 milyon manat, qısamüddətli aktivləri isə illik 6,27 faiz artımla 10,85 milyon manat təşkil edib.
2011-ci ildə pul vəsaitlərində və onların ekvivalentlərində 5,054 milyon manat, uzunmüddətli maliyyə aktivlərində isə 0,555 milyon manat yığılıb.
2011-ci ilin yekunları üzrə "Bakı Sığorta" ASC şirkətinin ödənilmiş nizamnamə kapitalı 5,5 milyon manat səviyyəsində olub, 2010-cu ildə bu rəqəm 4,38 milyon manat olub. Şirkət 2011-ci ili 0,638 milyon manat həcmində xalis gəlirlə başa çatdırıb.
Ötən ilin sonuna görə şirkətin məcmu kapitalı 2010-cu illə müqayisədə 9,64 faiz artaraq 6,39 milyon manat təşkil edib.
Şirkətin nizamnamə öhdəlikləri 1,3 faiz artaraq 5,993 milyon manat, ümumilikdə kapital və öhdəliklər isə 4,05 faiz artımla 12,382 milyon manat təşkil edib.
Ötən ilin yekunları üzrə şirkətin gəlirləri 5,011 milyon manat, sığorta üzrə gəlirləri 3,948 milyon manat, əsas əməliyyat gəlirləri isə 4,691 milyon manat olub.
2011-ci il ərzində xərclər 4,33 milyon manat, sığorta ödənişləri 1,019 milyon manat, təkrar sığorta ödənişləri 1,28 milyon manat, aparılan işlərlə əlaqədar xərclər 1,51 milyon manat təşkil edib.
