...

Azərbaycanın sığorta bazarında həyat sığortasının payı azalıb

Biznes və iqtisadiyyat xəbərləri Materials 13 Aprel 2012 14:29 (UTC +04:00)

Azərbaycan, Bakı, 13 aprel /Trend, müxbir A.Axundov/

Azərbaycanda həyat sığortası ilə məşğul olmaq hüququna malik "Paşa Həyat", "Atəşgah Həyat" və "Qala Həyat" 2012-ci ilin birinci rübündə həyat sığortasının bütün növləri üzrə 9,56 milyon manat toplayıb ki, bu da ötən ilin yanvar-mart aylarının göstəricisini 41 faiz üstələyir.

Trend-in məlumatına görə, bu barədə cümə günü Azərbaycan Maliyyə Nazirliyinin 2012-ci ilin yanvar-mart aylarında sığorta şirkətlərinin fəaliyyəti haqqında dərc edilən hesabatında deyilir.
Bununla yanaşı, şirkətlərin yığımlarının ümumi həcmində həyat sığortası üzrə mükafatların payı il ərzində azalaraq 13,8 faizdən 11,71 faizə düşüb.

Bu növlər üzrə ödənişlər də artıb: 2012-ci ilin yanvar-mart aylarında 238 min manat dəyərində dəymiş ziyan ödənilib ki, bu da ötən ilin yanvar-mart aylarından 14,08 dəfə çoxdur.

2012-ci ilin ilk üç ayı ərzində şirkətlər istehsalatda peşə xəstəlikləri və bədbəxt hadisələr nəticəsində peşə əmək qabiliyyətinin itirilməsi hallarından icbari sığorta üzrə 5,96 milyon manat toplayıblar. Bu, ötən ilin analoji göstəricisindən 18,79 faiz azdır.

Könüllü həyat sığortası üzrə yığımlar il ərzində 5,76 dəfə artaraq 4,72 milyon manata çatıb. Həyat sığortası sahəsində yığımların böyük hissəsi (4,36 milyon manat) ömrün qalan hissəsinin sığortasının payına düşüb. Qalan hissə ölum halının sığortalanması (0,36 milyon manat) hesabına təmin edilib.

Yanvar-mart aylarında könüllü həyat sığortası üzrə 0,17 milyon manat məbləğində ödənişlər həyata keçirilib.

2012-ci ilin birinci rübündə ölkədə fəaliyyət göstərən bütün şirkətlərin mükafatlarının ümumi həcmi 81,6 milyon manat təşkil edib (il ərzində 66,17 faiz artım), hesabat dövründə ödənişlər isə 16,6 milyon manat olub (artım təxminən 28,2 faiz).

Xəbər lenti

Xəbər lenti