Azərbaycan, Bakı, 7 may /Trend, müxbir A.Axundov/
Azərbaycanda platin yataqlarının işlənməsinə investisiyaların cəlb edilməsi üçün bеynəlxalq ekspertlər tərəfindən onun ekspertizasının aparılması vacibdir. Bu barədə Trend-ə Azərbaycanın ekologiya və təbii sərvətlər naziri Hüseynqulu Bağırov bildirib.
"Beynəlxalq maliyyə institutları bizim kəşfiyyatımızı kreditləşmə üçün əsas olaraq qəbul etmirlər. Bеynəlxalq ekspertiza aparılmalıdır. Bu zaman nazirliyin vəzifəsi ehtiyatları aşkar və sübut etməkdir. Biz məsələnin iqtisadi tərəfi ilə məşğul olmuruq", - Bağırov deyib.
Onun sözlərinə görə, Azərbaycan platin hasilatı sahəsində böyük perspektivlərə malikdir.
"Bu proses gedir və bu çox uzun prosesdir", - Bağırov deyib.
2011-ci ildə Göygöl rayonunun cənub-şərqində dörd kvadrat kilometrlik sahədə aparılan nüvə-geodeziya tədqiqatları nəticəsində radioaktiv elementlər və platin qrupu elementləri aşkar edilib.
"Platin qrupunun başqa elementləri nəzərə alınmadan həmin sahədə platinin proqnoz resursları 50-100 min tona yaxın səviyyədə qiymətləndirilir", - bir müddət əvvəl Bağırov bildirmişdi.
