Azərbaycan, Bakı, 13 sentyabr /Trend, müxbir Ə.Həsənov/
Azərbaycanın artan iqtisadiyyatı getdikcə daha böyük diqqət cəlb edir. Trend-in məlumatına görə, bu barədə cümə axşamı Bakıda Azərbaycan-Niderland biznes forumunun açılışında Niderland nümayəndə heyətinin rəhbəri Arno Hoveraet bildirib.
"1992-ci ildən Niderland şirkətləri Azərbaycanda neft-qaz sahəsində fəaliyyət göstərirlər və iki dövlətin nümayəndələri iqtisadiyyatın başqa sahələrində də ikitərəfli əlaqələrin yaradılması və möhkəmləndirilməsi üçün hər cür səy göstərməlidirlər", - Hoveraet deyib.
Azərbaycan-Niderland biznes forumu Azərbaycanda İxracın və İnvestisiyaların Təşviqi Fondu (AZPROMO) tərəfindən təşkil olunub.
Niderlanddan biznes forumunda neft-qaz, energetika, su təchizatı, yeraltı infrastrukturlar, tikinti, logistika, müəssisələrdə təhlükəsizlik sistemlərinin quraşdırılması və nəzarət sahələrində fəaliyyət göstərən şirkətlərin rəhbərləri iştirak edir.
AZPROMO 2003-cü ildə Azərbaycan hökuməti tərəfindən yaradılıb.