Azərbaycan, Bakı, 10 oktyabr /Trend, müxbir A.Axundov/
Dövlət Sosial Müdafiə Fondu (DSMF) 2013-cü ildə gəlirlərini 2,6 milyard manata çatdırmağı planlaşdırır. Trend-in məlumatına görə, bu barədə çərşənbə günü jurnalistlərə DSMF sədri Səlim Müslümov bildirib.
DSMF-nin 2013-cü il üçün gəlir və xərcləri 2,454 milyard manat səviyyəsində proqnozlaşdırılır ki, bu da 2011-ci ilin göstəricisini 13,3 faiz üstələyir.
"Fondun gələn il üçün büdcə layihəsi artıq hazırlanıb, lakin hələ müzakirə olunmayıb. Layihədə gəlirlər üzrə nəzərdə tutulan proqnoz 2,6 milyard manatı üstələyir", - Müslümov vurğulayıb.
Onun sözlərinə görə, bu artım DSMF-yə gələn il əmək pensiyalarının sığorta və baza hissələrini artırmağı təmin etməyə imkan verəcək.
"Gəlirlərin artması qeyri-leqal işədüzəltmə və işçilərin rəsmiləşdirilməsi ilə mübarizə üzrə güclənən tədbirlərə yardım edir. Bununla əlaqədar təkcə son iki ay ərzində Vergilər Nazirliyi 200 min şəxs haqqında məlumat təqdim edib", - Müslümov vurğulayıb.