Azərbaycan, Bakı, 22 oktyabr /Trend, müxbir C.Nəsibova/
Dünya Bankının (DB) layihə qrupunun rəhbəri Elizabet Vanqın başçılığı ilə missiya Azərbaycanda dövlət investisiyaları sahəsində kadr potensialının gücləndirilməsi üzrə layihənin icmalı üçün Bakıya gələcək. Bu barədə bazar ertəsi Trend-ə DB-nin Bakı nümayəndəliyindən bildiriblər.
Missiya layihənin reallaşdırılmasının monitorinqini aparmaq məqsədilə cari il oktyabrın 27-dən noyabrın 3-dək ölkədə olacaq.
Səfər zamanı mövcud layihə çərçivəsində müəssisələrin fəaliyyətinin, habelə layihə çərçivəsində əldə edilən nəticələrin, mövcud çatışmazlıqların və müsbət aspektlərin icmalı məqsədilə ikitərəfli görüşlərin keçirilməsi gözlənilir.
Layihəyə dövlət investisiyaları proqramını reallaşdıran təşkilatlar, o cümlədən, yol, su-kanalizasiya və digər sahələrdə fəaliyyət göstərən müəssisələr cəlb edilib.
Layihə çərçivəsində nəqliyyat (30 faiz), su (30 faiz), təhsil (20 faiz), dövlət idarəetməsi (10 faiz) və enerji (10 faiz) sektorlarında dövlət investisiyalarının idarə edilməsi sahəsində Azərbaycanda kadr potensialının gücləndirilməsi planlaşdırılır.
2012-ci il sentyabrın 30-na olan vəziyyətə görə, DB-nin bu layihənin həyata keçirilməsinə ayırdığı 8 milyon dollar kreditdən 5,24 milyon dollar istifadə olunub. Kredit vəsaitləri Beynəlxalq İnkişaf Assosiasiyasının şərtlərinə əsasən 10 illik güzəştlə 20 il müddətinə təqdim edilib. Layihənin ümumi dəyəri 10 milyon dollardır, bu vəsaitdən 2 milyon dollar hökumətin layihədə iştirak payı hesabına təmin ediləcək.