Azərbaycan, Bakı, 26 noyabr /Trend, müxbir E.İsmayılov /
2012-ci il oktyabrın 1-nə olan məlumata görə, Azərbaycan Respublikası Dövlət Neft Fondundan (ARDNF) Samur-Abşeron suvarma sisteminin rekonstruksiya layihəsi çərçivəsində cəmi 810,6 milyon manat vəsait ayrılıb. Bu barədə ARDNF-nin rəsmi saytında bazar ertəsi yerləşdirilmiş xəbərdə deyilir.
"O cümlədən 354,5 milyon manat Taxtakörpü su anbarı ilə birlikdə su elektrik stansiyasının tikintisinə ayrılıb. Öz növbəsində, Taxtakörpü-Ceyranbatan və Vəlvələçay-Taxtakörpü kanallarının tikintisinə müvafiq olaraq 307,3 və 117,4 milyon manat ayrılıb", - fondun məlumatında deyilir.
Vəsaitlərin qalan hissəsi layihə qrupunun saxlamasına (2,4 milyon manat), neft və qaz kəmərlərinin köçürülməsinə (20 milyon manat), layihə smetası və tikinti üçün tender sənədləşməsinin hazırlığına (1,8 milyon manat), qaçqınlar üçün 70 evdən ibarət qəsəbənin tikintisinə (1,5 milyon manat), torpaqların alınması və zərərin ödənməsinə (5,2 milyon manat), avtomobil yollarında piyada keçidlərinin tikintisinə (0,5 milyon manat) ayrılıb.