Azərbaycan, Bakı, 12 dekabr /Trend, müxbir A.Axundov/
Azərbaycanda bankların çoxu məcmu kapitala yeni normativ tələblərin öhdəsindən gələcək. Trend-in məlumatına görə, bu barədə çərşənbə günü jurnalistlərə Azərbaycan Mərkəzi Bankının (AMB) İdarə heyətinin sədri Elman Rüstəmov deyib.
"AMB və kommersiya bankları artıq konsolidasiya üzrə danışıqlara başlayıblar. Hesab edirik ki, bankların çoxu kapitallaşdırmaya olan yeni tələblərin öhdəsindən gələcək", - Rüstəmov qeyd edib.
Onun sözlərinə görə, hazırda bankların 87 faizinin məcmu kapitala olan yeni tələblərə cavab verir.
"Əlbəttə ki, bankların qalan 13 faizini bağlanma təhlükəsi gözləmir, əksinə, onların bazarda iri oyunçularla rəqabət apara bilmələri üçün birləşməsi, möhkəmlənməsi və inkişafı mümkündür", - Rüstəmov bildirib.
Onun sözlərinə görə, Avropa Yenidənqurma İnkişaf Bankı və Beynəlxalq Maliyyə Korporasiyası kimi beynəlxalq maliyyə institutları konsolidasiya prosesində, o cümlədən mümkün yeni qrupların kapitalında maraqlıdırlar və iştirak etməyə hazırdırlar.
