Azərbaycan, Bakı, 5 fevral /Trend, müxbir A.Axundov/
Azərbaycan və Avropa Komissiyası arasında assosiativ sazişin imzalanması məqsədilə danışıqlar prosesi çərçivəsində aprel ayında plenar iclas keçiriləcək. Bu barədə çərşənbə axşamı Trend-ə xarici işlər nazirinin müavini Mahmud Məmmədquliyev deyib.
"Çox güman ki, aprelin 9-da Brüsseldə danışıqlar qrupunun plenar iclası keçiriləcək", - Məmmədquliyev qeyd edib.
Onun sözlərinə görə, tərəflər videokonfranslar çərçivəsində müzakirələri bərpa ediblər. Görüşlər və videokonfranslar artıq bir neçə aydır keçirilmir.
"Videokonfranslar artıq başlayıb. Biri yanvarda olub. Fevralda daha birinin keçirilməsi planlaşdırılır. Bir sıra məsələlər üzrə danışıqlar gedir", - Məmmədquliyev qeyd edib.