Azərbaycan, Bakı, 5 sentyabr /Trend, müxbir E.Əliyev/
Azərbaycanda ödəniş kartlarının sayı iyulda 1,4 faiz artaraq 5,375 milyon ədədə çatıb. 2012-ci ilin müvafiq dövrünün göstəricisi ilə müqayisədə kartların sayı 11,79 faiz artıb. Trend-in məlumatına görə, bu barədə Azərbaycan Mərkəzi Bankının (AMB) statistik hesabatında deyilir.
İyulda bankomat və POS-terminallar vasitəsilə ödəniş kartları üzrə ümumi dövriyyə 920 milyon manat, əməliyyatların ümumi sayı isə 5,982 milyon ədəd təşkil edib.
Debet kartlar üzrə əməliyyatların ümumi sayı 4,98 milyon ədəd, dəyəri isə 772 milyon manat olub.
Ölkə daxilində debet kartlar üzrə əməliyyatların ümumi sayından bankomatlar vasitəsilə 701 milyon manat məbləğində 4,15 milyon, POS-terminallar vasitəsilə 51 milyon manat məbləğində 589 min əməliyyat yerinə yetirilib.
2013-cü ilin iyul ayında kredit kartları üzrə 148 milyon manat dəyərində 1004 min əməliyyat həyata keçirilib.
Kredit kartları üzrə əməliyyatların ümumi sayından bankomatlar vasitəsilə 70 milyon manat dəyərində 299 min əməliyyat, POS-terminallar vasitəsilə isə 35 milyon manat dəyərində 501 min əməliyyat keçirilib.
2013-cü il avqustun 1-nə olan məlumata əsasən, ölkədə 2368 bankomat fəaliyyət göstərib, onlardan 1336 ədədi Bakıda, 1032 ədədi isə ölkənin digər şəhər və rayonlarında yerləşir.
Bankomatların ümumi sayı il ərzində 173 ədəd və ya 7,88 faiz artıb.
2013-cü il avqustun 1-nə olan məlumata görə, POS-terminalların sayı 36 388 ədəd təşkil edib ki, onlardan 32 470 ədədi Bakıda, 3918 ədədi isə digər şəhər və rayonlarda yerləşir.
POS-terminalların sayı 2012-ci ilin iyulundan etibarən 135 ədəd və ya 0,4 faiz artıb.
