Azərbaycan, Bakı 21 sentyabr /Trend, müxbir A. Axundov/
Əmlak Məsələləri Dövlət Komitəsi "Bakı Elektriktökmə" ASC-nin səhmlərinin 98,71 faizinin satışı üzrə investisiya müsabiqəsi elan edib. Trend-in məlumatına görə, bu barədə şənbə günü "Mülkiyyət" qəzetində dərc edilən məqalədə deyilir.
Müsabiqədə Azərbaycanın fiziki və hüquqi şəxsləri və xarici investorlar iştirak edə bilərlər.
Müsabiqədə iştirak etmək istəyənlər investisiya proqramını, investisiya təklifinin dəyərinin 5 faizi qədərində olan bank zəmanətini, həmçinin dövlət büdcəsinə 900 min manat köçürülməsi ilə bağlı təklif təqdim etməlidirlər. İddiaçı niyyətinin ciddi olduğunu təqdiq etmək üçün istənilən bankın 300 min manat məbləğində zəmanət məktubunu təqdim etməlidir.
İnvestisiya proqramı yeni texnologiyaların tətbiqi, istehsal edilən məhsulun keyfiyyətinin artırılması, onun çeşidinin genişləndirilməsi, iş yerlərinin bərpası üzrə təkliflərdən ibarət olmalıdır.
2013-cü il avqustun 1-nə olan məlumata görə ASC-nin nizamnamə kapitalı 2,124 milyon manat olub, bu məbləğə hər birinin nominal dəyəri 2 manat olan 1,062 milyon səhm buraxılıb. Müsabiqənin predmeti ümumi dəyəri 2,097 milyon manat olan 1 048 709 səhmdir.
Müəssisənin avqustun 1-nə olan kredit borcu 2,79 milyon manat, debitor borcu 1,05 milyon manat olub. ASC-nin işçilərinin sayı 146 nəfərdir.
Müsabiqədə iştirak etmək istəyənlər aşağıdakı ünvanda bu ilin oktyabrın 21-dək saat 10:00-dan 17:00 qədər əlavə məlumat ala və özəlləşdirmə planı ilə tanış ola bilərlər: Bakı şəhəri, Y. Səfərov küçəsi, 20.
Sənədlər və təkliflər 2013-cü il 21 oktyabr tarixinədək saat 10:00-dan 17:00-dək qəbul edilir. Müsabiqə komissiyasına daxil olan təkliflərin qiymətləndirilməsi 23 oktyabr 2013-cü il tarixində Dövlət Komitəsinin binasında saat 15:00-dan etibarən həyata keçiriləcək.
