Azərbaycan, Bakı, 24 oktyabr /Trend, müxbir A.Axundov/
Gələn il Azərbaycan meyvə və giləmeyvə ixracını artırmağı davam etdirəcək. Trend-in məlumatına görə, bu barədə 2014-cü il dövlət büdcəsi layihəsində bildirilir.
Sənədə əsasən, 2012-ci ildə meyvə və giləmeyvə idxalı 65,2 min ton idisə, hökumətin proqnozlarına görə, 2013-cü ildə bu rəqəm 60 min ton, 2014-cü ildə isə 50 min tona qədər azalacaq. Bundan əlavə, hökumət 2012-ci ildə 230,7 min ton olan meyvə və giləmeyvə ixracının 2013-cü ildə 235 min tona, 2014-cü ildə isə 240 min tona çatdırılacağını proqnozlaşdırır.
2012-cü ildə bu növ məhsul üzrə Azərbaycanın özünü təmin etməsi 125,7 faiz, 2013-cü ildə gözlənilən göstərici 127,3 faiz, 2014-cü ildə isə analoji göstərici 129,1 faiz olacaq.
Layihəyə əsasən, 2012-ci ildə ölkədə 810 min ton meyvə və giləmeyvə yetişdirilib, 2013-cü ildə 815,1 min ton, 2014-cü ildə isə 843,7 min ton meyvə və giləmeyvənin yetişdiriləcəyi gözlənilir.
Ötən il ölkədə meyvə və giləmeyvələrə tələbat 632,6 min ton olub. Hökumətin proqnozlarına görə, 2013-cü ildə bu tələbat 635 min ton, 2014-cü ildə isə 637,45 min tona qalxacaq.