Azərbaycan, Bakı, 12 dekabr /Trend, müxbir E.Əliyev/
2013-cü ilin yanvar-oktyabr aylarının nəticələri üzrə Azərbaycan regionlarında əhaliyə verilən kreditlər 1974,6 milyon manat və ya bankların kredit portfelinin ümumi həcminin 13,17 faizini təşkil edib. Trend-in məlumatına görə, bu barədə Azərbaycan Mərkəzi Bankının (AMB) statistik hesabatında deyilir.
AMB-nin məlumatına görə, Bakı üzrə bu göstərici 13 016,8 milyon manat təşkil edib ki, burada milli valyutada verilən kreditlərin payına 9 208,4 milyon manat düşüb. 2013-cü il noyabrın 1-nə ölkədə orta faiz dərəcəsi 14,2 faiz, Bakı üzrə isə 13,3 faiz təşkil edib.
Kreditləşmənin həcmi Abşeron iqtisadi rayonu üzrə orta faiz dərəcəsi 18,8 faiz olmaqla 444,1 milyon manat, Aran iqtisadi rayonu üzrə 19,9 faizlə 694,25 milyon manat, Dağlıq Şirvan - 22,2 faizlə 68,1 milyon manat, Gəncə-Qazax - 20,3 faizlə 258,7 milyon manat, Quba-Xaçmaz - 21,3 faizlə 73,3 milyon manat, Lənkəran - 21,9 faizlə 202,8 milyon manat, Şəki-Zaqatala - 20,9 faizlə 98,7 milyon manat, Yuxarı Qarabağ - 14,9 faizlə 39,32 milyon manat, Kəlbəcər-Laçın - 22,1 faizlə 14,1 milyon manat, Naxçıvan - 15,6 faizlə 81,2 milyon manat olub.
Qeyd edək ki, Azərbaycanda 43 bank fəaliyyət göstərir.