Azərbaycan, Bakı, 5 fevral /Trend, müxbir A.Axundov/
2014-cü il ərzində Bakıda kommersiya daşınmaz əmlak obyektlərin qiyməti 5-6 faiz artacaq. Bunu çərşənbə günü Trend-ə "MBA Group" konsaltinq şirkətinin baş direktoru Nüsrət İbrahimov deyib.
Onun sözlərinə görə, 2013-cü il ərzində kommersiya obyektləri bazarında qiymətlər 21,29 faiz, icarə qiyməti isə 0,62 faiz artıb.
Ötən ilin yanvar ayında belə daşınmaz əmlakın 1 kvadratmetri orta hesabla 3312 dollar olduğu halda, dekabrda orta hesabla qiymət 4017 dollara çatıb.
N.İbrahimov bildirib ki, bütün il ərzində artan qiymətlər ilin sonuna azalmağa başlayıb ki, bunu da kommersiya obyektlərinin gəlirlilik göstəricisinin azalmasının nəticəsi kimi dəyərləndirmək olar.
Ekspert hesab edir ki, qiymətlərin intensiv artımı, köhnə binaların yerində yeni binaların tikintisi tendensiyası satıcıları gözləmə mövqeyində dayanmağa sövq edib.
