Azərbaycan, Bakı, 25 fevral /Trend, müxbir E.İsmayılov/
"Azərbaycan Dəmir Yolları" QSC Azərbaycan və Türkiyə dəmiryollarını birləşdirəcək Bakı-Tbilisi-Qars yeni dəmiryolu boyunca vağzal və sərnişin stansiyalarının yenidən qurulması və yenilənməsi üzrə işlər görür. Bunu Trend-ə QSC-nin mətbuat xidmətinin rəhbəri Nadir Əzməmmədov deyib.
Onun sözlərinə görə, artıq Gəncədəki stansiyada işlər tamamlanıb, ölkənin bölgələrində digər stansiyaların yenidən qurulması isə hələ davam edir: "Həmçinin Bakıda əsas sərnişin stansiyası və vağzalının modernləşdirilməsi nəzərdə tutulur. Bu işlərin mərhələli şəkildə aparılması planlaşdırılır".
Qeyd edək ki, Azərbaycan Nəqliyyat Nazirliyi "Azəryolservis" ASC-nin rəhbəri Cavid Qurbanov daha əvvəl bildirmişdi ki Azərbaycan və Türkiyəni birləşdirəcək Bakı-Tbilisi-Qars dəmiryolunun yaradılması prosesinin başa çatması 2015-ci ilin ortalarında mümkün olacaq.
Ümumilikdə uzunluğu 180 kilometr təşkil edən Bakı-Tbilisi-Qars dəmiryolunun tikintisi çərçivəsində 100 kilometrlik dəmiryol xəttinin çəkilişi başa çatıb. C.Qurbanov bildirib ki, artıq 2014-cü ilin sonunda layihə çərçivəsində Azərbaycandan Gürcüstanın Türkiyə sərhədinədək sınaq teplovozunun buraxılışı planlaşdırılır.
Qeyd edək ki, Bakı-Tbilisi-Qars dəmiryolu Gürcüstan-Azərbaycan-Türkiyə dövlətlərarası sazişi əsasında tikilir. Bakı-Tbilisi-Qars layihəsi çərçivəsində 105 kilometr uzunluğunda yeni dəmiryol magistralı xəttinin tikilməsi planlaşdırılır.
