Azərbaycan, Bakı, 6 mart /Trend, müxbir A.Axundov/
"Paşa Bank" iki il ərzində avrobondların buraxılışına başlamağı planlaşdırır. Trend-in məlumatına görə, bunu cümə axşamı bankın İdarə heyətinin üzvü Taleh Kazımov "Fitch Ratings" beynəlxalq reytinq agentliyinin Bakıda təşkil etdiyi III Azərbaycan illik konfransı çərçivəsində keçirilmiş panel müzakirələrində deyib.
Onun sözlərinə görə, bankın 2011-ci ilin sonundan etibarən korporativ qiymətli kağızlarla iş təcrübəsi var.
Bu vaxtdan etibarən "Paşa Bank" ümumi dəyəri 180 milyon dollar olan 20 buraxılışda iştirak edib. Bank bu il isə 60-90 milyon dollar məbləğində 4 sövdələşmə həyata keçirməyi planlaşdırır.
T.Kazımov qeyd edib ki, emitentlərin təqribən 70 faizi maliyyə sektorunu təmsil edir.
"Paşa Bank" Azərbaycanda ilk dəfə olaraq korporativ kağızlar üzrə market-meyker xidmətləri göstərməyə başlayıb.
