Azərbaycan, Bakı, 13 mart /Trend, müxbir A.Axundov/
"Paşa Bank" Açıq Səhmdar Cəmiyyətinin (ASC) avrobondlarının buraxılışının ilkin həcmi 150 milyon dolları ötəcək. Bu barədə jurnalistlərə bankın İdarə heyətinin üzvü Taleh Kazımov bildirib.
Onun sözlərinə görə, avrobondların buraxılışı iki-üç ilin məsələsidir: "Biz beynəlxalq kapital bazarlarına ilk uğurlu çıxışı klub kredit xətti ilə başlamışıq, onun çərçivəsində ötən il beynəlxalq tərəfdaşlardan bir il müddətinə 30,25 milyon dollar cəlb etmişik. Bu, təcrübə qazanmaq üçün ilk addım atmaqdan ötrü kiçik məbləğdir. Əlbəttə ki, valyuta maliyyələşdirməsi də zərurət idi. Bu həm maliyyə, həm də imic baxımından maraqlı idi".
T.Kazımov qeyd edib ki, bu il bank həmin məbləği sindikatlaşdırma çərçivəsində artırmağı planlaşdırır, çünki əməliyyatların həcmi artır. Layihələrdən asılı olaraq son iki ildə böyük ehtimalla istiqrazların buraxılışından vəsaitlərin cəlb edilməsinə tələbat olacaq: "Biz ona görə bunu bu gün etmirik ki, 150 milyon dollardan az məbləğlə istiqraz bazarına daxil olmağın mənası yoxdur. Bu məbləğə qədər biz sindikat çərçivəsində vəsaitləri cəlb edə bilərik. Əgər biznesin bazarda daha uzunmüddətli və iri maliyyə resurslarını cəlb etməyə ehtiyacı olarsa, hesab edirəm ki, biz avrobondların buraxılışına üstünlük verəcəyik".
Qeyd edək ki, bank 2011-ci ilin sonlarından korporativ qiymətli kağzılarla iş təcrübəsinə malikdir. Həmin vaxtdan "Paşa Bank" ümumi məbləği 180 milyon dollar olan 20 buraxılışda iştirak edib, bu il isə bank 60-90 milyon dollarlıq dörd sövdələşmə həyata keçirməyi planlaşdırır.
Emitentlərin 70 faizə yaxını maliyyə sektorunu təmsil edir.
"Paşa Bank" Azərbaycanda ilk dəfə olaraq korporativ kağızlarla market-meyker xidməti göstərməyə başlayıb.
