Azərbaycan, Bakı, 15 mart /Trend, müxbir A.Axundov/
Dövlət Gömrük Komitəsi (DGK) cari ilin yanvar-fevral aylarında xarici ticarət əməliyyatlarının ötən ilin analoji dövrü ilə müqayisədə 11,56 faiz azaldığını bildirib. Trend-in məlumatına görə, bu barədə şənbə günü Komitənin hesabatında deyilir.
Bu dövr ərzində Azərbaycan 112 ölkə ilə ticarət əməliyyatı aparıb. Hesabata görə, Azərbaycanın ümumi ticarət dövriyyəsinin həcmi 4,968 milyard dollar təşkil edib. Xarici ticarət əməliyyatlarında 2,6 milyard dollara yaxın müsbət saldo yaranıb.
Hesabatda bildirilir ki, bu dövr ərzində ölkənin xarici ticarət əməliyyatlarında 2480 hüquqi və fiziki şəxs iştirak edib ki, onlardan 1879 hüquqi, 601-i isə fiziki şəxsdir.
Yanvar-fevral aylarında 3,78 milyard dollar həcmində ixrac əməliyyatları həyata keçirilib ki, bu da ötən ilin analoji dövr göstəricisindən 9,69 faiz azdır.
İxrac əməliyyatlarında dövlət sektorunun payı 3,56 milyard dollar (94,99 faiz), özəl sektor - 179,83 milyard dollar (4,76 faiz), fiziki şəxslərin payı isə 9,41 milyon dollar (0,25 faiz) olub.
Yanvar-fevral aylarının yekunlarına görə, idxal 1,19 milyard dollar təşkil edib ki, bu da 2013-cü ilin analoji dövründə qeydə alınan göstəricidən 17,01 faiz azdır.
İdxal əməliyyatlarında dövlət sektorunun payı 243,87 milyon dollar (20,5 faiz), özəl sektor - 906,99 milyon dollar (76,23 faiz), fiziki şəxslərin payı isə 39,02 milyon dollar (3,27 faiz) olub.
Cari ilin yanvar-fevral aylarında Azərbaycandan 912 adda məhsul ixrac, 3955 adda məhsul isə idxal olunub.
