Azərbaycan, Bakı, 15 aprel/Trend, müxbir E. Əliyev/
2014-cü ilin yanvar-mart aylarında Azərbaycanın iqtisadi və sosial sahələrinin inkişafı üçün bütün maliyyə mənbələrindən əsas kapitala 3125,9 milyon manat yatırılıb ki, bu da ötən ilin I rübünün göstərcisini 7 faiz üstələyir. Trend-in məlumatına görə, bu barədə çərşənbə axşamı Dövlət Statistika Komitəsinin hesabatında deyilir.
İnvestisiyaların ümumi həcminin 67,4 faizi tikinti-montaj işlərinə qoyulmuş investisiyaların payına düşüb. Bu göstəricinin artımı 25,4 faiz olub.
I rübdə istehsal yönümlü obyektlərin tikintisinə 2189,5 milyon manat, xidmət sahəsindəki obyektlərə 936,4 milyon manat investisiya yatırılıb. İnvestisiyaların 49,5 faizi dövlət, 50,5 faizi isə qeyri-dövlət müəssisələrinin payına düşür.
İnvestisiyaların ümumi həcminin 67,5 faizi daxili investisiyaların payına düşüb ki, bunlar da il ərzində 6 faiz artıb. Daxili investisiyaların əksər hissəsi (68,7 faiz) dövlət müəssisə və təşkilatlarının, 31,3 faizi isə özəl müəssisələrin payına düşüb.
Müəssisə və təşkilatların vəsaitləri hesabına əsas kapitala 1733,6 milyon manat (investisiyaların ümumi həcminin 55,5 faizi), büdcə vəsaitlərindən 1138,2 milyon manat (36,4 faiz), bank kreditlərindən 141,7 milyon manat (4,5 faiz), büdcədənkənar fondların vəsaitlərindən 32,4 milyon manat (1 faiz), əhalinin şəxsi vəsaitlərindən 75,2 milyon manat (2,4 faiz) və digər vəsaitlərdən 4,8 milyon manat (0,2 faiz) investisiya yatırılıb.
Əsas kapitala yatırılmış vəsaitlərin 56,2 faizi (1756,3 milyon manat) qeyri-neft sektorunun inkişafına qoyulub, o cümlədən 168,5 milyon manat qeyri-neft sənayesi sektoruna yatırılıb. Ölkənin neft sektoruna 1369,6 milyon manat (43,8 faiz), investisiya yatırılıb ki, bu da 2013-cü ilin I rübünün göstəricisini 26,1 faiz üstələyir.
Dövlət Statistika Komitəsindən qeyd ediblər ki, investisiyaların 49,2 faizi sənaye sahəsinin, 18,4 faizi tikintinin, 7,8 faizi dövlət idarəçiliyinin, 7 faizi istirahət, əyləncə və incəsənətin, 5,2 faizi nəqliyyat və anbar təsərrüfatının, 2,8 faizi təhsilin, 2,5 faizi kənd təsərrüfatının, 2,2 faizi səhiyyənin, 2 faizi ticarətin, 1 faizi daşınmaz əmlakla bağlı əməliyyatların, 0,9 faizi rabitə və informasiyanın, 0,5 faizi inzibati və yardımçı xidmətlərin göstərilməsinin, 0,4 faizi maliyyə və sığorta fəaliyyətinin, 0,1 faizi isə turistlərin yerləşdirilməsi və iaşə sahəsinin payına düşüb.