Azərbaycan, Bakı, 15 may /Trend, müxbir E.Əliyev/
Apreldə Bakıda təkrar mənzil bazarında orta hesabla qiymət əvvəlki aylarla müqayisədə 0,7 faiz artaraq 1 kvadratmetrə görə 1211 dollar təşkil edib. Trend-in məlumatına görə, bu barədə cümə axşamı "Əmlak Bazarı İştirakçıları" İctimai Birliyinin Bakının daşınmaz əmlak bazarının monitorinqinin nəticələri üzrə məlumatında deyilir.
Monitorinqin nəticələrinə əsasən, apreldə təkrar mənzil bazarında təkliflərin həcmi 3,7 faiz azalıb. Satışa çıxarılan mənzillərin sayı 5400-dək azalıb.
Ümumi təkliflər portfelində Yasamal, Nəsimi, Nərimanov və Xətai rayonlarının payı 78,7 faiz təşkil edib. Portfelin uzun müddət bu 4 rayon hesabına formalaşdırılması yeni tikililərin qeyd edilən rayonlarda bazara çıxarılması ilə əlaqədardır. Araşdırmalar göstərir ki, ilkin bazarda da təkliflər portfeli əsasən Bakının bu 4 rayonu sayəsində formalaşır.
Bazarda orta qiymətdən aşağı təklif edilən təkrar mənzilin payı 53,1 faiz olub. Apreldə təkrar mənzil bazarında təklif edilmiş orta otaq göstəricisi 2,79 faiz, hər bir otağın qiyməti 46 472 dollar, mənzillərin qiyməti isə 113162 dollar olub.
