Azərbaycan, Bakı, 29 may /Trend, müxbir İ.Xəlilova/
2015-ci ilin sonuna 2016-cı ilin I rübün əvvəlinə Azərbaycanın qiymətli kağızlar bazarının iştirakçıları üçün inteqrasiya edilmiş elektron platformanın tətbiqi prosesini başa çatdırmaq planlaşdırılır. Bunu cümə axşamı Trend-ə Bakı Fond Birjasının (BFB) İdarə Heyətinin sədri Fariz Əzizov deyib.
Onun sözlərinə görə, bu, iddialı layihədir: "Layihə əsas oyunçuları bir araya gətirməyə hesablanıb. Belə ki, tənzimləyici, alqı-satqıların təşkilatçıları, mərkəzi depozitoriya, brokerləri vahid informasiya məkanında birləşdirmək nəzərdə tutulur".
İndiki mərhələdə bazarda əməliyyatları tənzimləmək üçün onlardan hər birinin öz interfeysi var və bu platformaların sinxronlaşdırılması məqsədilə xeyli səy göstərilir.
F.Əzizov qeyd edib ki, birləşmiş platforma xarici ölkələrdəki bir çox oyunçuların arzusudur, çünki bu, məhsuldarlığı artırmağa və xərcləri azaltmağa, bazarda yeni həlləri dərhal tətbiq etməyə imkan verəcək.
Onun sözlərinə görə, elektron platformanın alınması üçün podratçının seçilməsi üzrə beynəlxalq tender elan edilib: "Nəzərə alınsa ki, inteqrasiya edilmiş sistem bir sıra institutların - tənzimləyici, depozitariya, birjalar, vasitəçilərin tələblərinə, emitentlər və investorların maraqlarına cavab verməli olacaq, o zaman seçim prosesi kifayət qədər uzun çəkəcək və ilin sonuna yekunlaşacaq".
F. Əzizov vurğulayıb ki, bazarın birləşmiş informasiya platforması olduqcaq qabaqcıl təcrübə hesab edilsə də, həllərin razılaşdırılmaması səbəbindən hər bir ölkə belə bir layihəni həyata keçirə bilmir.
İşlərin maliyyələşdirilməsi Azərbaycan hökumətinin ölkədə kapital bazarının müasirləşdirilməsi üzrə Dünya Bankı ilə sazişi çərçivəsində nəzərdə tutulur.