Azərbaycan, Bakı, 25 iyun /Trend, müxbir Emin Əliyev/
Azərbaycanda sığorta haqlarının hissə-hissə ödənilməsi təcrübəsinin genişləndirilməsi satışların artım drayveri olur.
Bunu çərşənbə günü Trend-ə "Bakı Sığorta" ASC-nin İdarə Heyətinin sədr müavini Ramin Məmmədov deyib.
R.Məmmədov bildirib: "Məhsullarımızın bir çoxunun haqqını hissə-hissə ödəmək olar. Belə təcrübəni tətbiq etmək, həmçinin ona görə sərfəlidir ki, əhalinin möhlətli satış barədə aydın təsəvvürü yaranıb, kreditlə alış-veriş etmək mədəniyyəti formalaşıb. Bununla da polislərin satışı müştərilərə ona görə sərfəlidir ki, heç bir faiz yoxdur - ödəniş məbləği 6 və 12 bərabər hissəyə bölünür. Bunun sayəsində təkcə ötən il şirkətin müştəri bazası, xüsusilə KASKO kompleks sığortası üzrə 2 dəfən çox artıb".
O qeyd edib ki, şirkət məhsul çeşidinin genişləndirilməsi üzərində işləri davam etdirəcək: "Biz ilin sonunadək 2 yeni məshulu bazara çıxarmağı planlaşdırırıq. Məhsulların hər ikisi avtomobillərin sığortası sahəsinə aiddir. Fikrimcə, onlardan birinin tətbiqinə avqustda başlanılacaq. Konkret müddət bazardakı mövcud vəziyyətdən asılı olacaq".
