Azərbaycan, Bakı, 25 iyun /Trend, müxbir Zülfiyyə Qurbanova/
2014-cü il iyulun 1-nə işə salınması planlaşdırılan "Elektron ipoteka" layihəsi mənzillərin alınması üçün kreditlərin verilməsi prosesinə yalnız müsbət təsir edəcək. Bunu Trend-ə Azərbaycan Mərkəzi Bankının (AMB) baş direktoru Rəşad Orucov deyib.
Onun sözlərinə görə, AMB yanında Azərbaycan İpoteka Fondunun tətbiq etdiyi "Elektron ipoteka" pilot layihəsinə hazırda 5 müvəkkil bank qoşulub.
R.Orucov bildirib ki, bu layihənin reallaşdırılması ipotekanın verilməsi prosesində fondun və bankların, habelə bu xidmətlərdən istifadə edən insanların fəaliyyətini sadələşdirəcək: "İnsanların krediti elektron formada almaq üçün ərizə vermək, həmçinin onların tədavülünün hansı mərhələdə olduğunu izləmək imkanı yaranacaq. Bundan başqa, bu sistem sayəsində borclananlar krediti layihəyə qoşulmuş istənilən bankın filialında, habelə elektron formada və poçt şöbələrində ödəyə biləcəklər. Layihə tətbiq edilən zaman artıq "Elektron ipoteka"ya AİF-in bütün müvəkkil bankları qoşulacaq".