Azərbaycan, Bakı, 7 avqust /Trend/
2014-cü il iyulun 1-nə olan vəziyyətə görə, ölkə banklarının aktivləri 22,57 milyard manat təşkil edib. Bu rəqəm 2013-cü ilin iyun ayının yekunları üzrə 18,19 milyard manat olub. Bu barədə Trend Azərbaycan Mərkəzi Bankının statistik hesabatına istinadən məlumat verir.
AMB-nin məlumatına görə, il ərzində bankların aktivləri 24,1 faiz artıb.
Bank sektoru aktivlərinin əsasını (68,5 faiz) müştərilərə verilən 15,47 milyard manat dəyərində kreditlər (il ərzində 23,27 faiz artım), investisiyalar (xüsusi çəkisi 8,44 faiz və 21,1 faiz artımla 1,905 milyard manat) və müxbir hesablarındakı vəsaitlər (1,407 milyard manat) təşkil edib.
Maliyyə sektoruna verilən kreditlər və depozitlər may ayında 1,167 milyard manat olub.
Passivlər strukturunda əsas payı (42,33 faiz) 13,25 faiz artan depozitlər (2014-cü il iyulun 1-nə 9,554 milyard manat) təşkil edir.
Maliyyə sektorundan alınan kreditlər və depozitlər 34,2 faiz artaraq 7,884 milyon manat təşkil edib.
2014-cü ilin I yarısının yekunları üzrə Azərbaycanda 44 bank faliyyət göstərib: 42 kommersiya bankı və 1 dövlət bankı. Xarici kapitallı banklar 22 ədəddir. Onlardan 7-də xarici kapitalın xüsusi çəkisi 50-100 faiz, 13-də 50 faizədək təşkil edir, həmçinin xarici bankların iki yerli filialı fəaliyyət göstərir.
