Azərbaycan, Bakı, 4 oktyabr /Trend, müxbir Azad Həsənli/
2014-cü ilin avqust ayında Azərbaycan Mərkəzi Bankı (AMB) yanında Mərkəzləşdirilmiş Kredit Reyestri Xidmətinə 286 404 müraciət daxil olub. Trend-in məlumatına görə, bu barədə Mərkəzi Bankın 2014-cü ilin ilk 8 ayının nəticələri üzrə statistik hesabatında deyilir.
2013-cü ilin müvafiq dövrünün göstəricisi (203 688) ilə müqayisədə Xidmətə müraciətlər 45,97 faiz artıb.
İyulda banklardan kredit reyestrinə 279 917 sorğu (il ərzində artım 42,99 faiz) daxil olub, 6487 nəfər öz kredit tarixçəsi barədə məlumat almaq məqsədilə müraciət edib.
Avqust ayının sonuna olan məlumata görə, kredit reyestrində haqqında məlumat olan borcalanların sayı 2 194 966, kredit məlumatlarının ümumi sayı isə 8 117 093 təşkil edir.
Borc götürənlərin ümumi sayından 2 165 547-si fiziki şəxs, 10 584-ü hüquqi şəxs, 18 835-i isə sahibkarlıq subyektidir. Borc götürənlər arasında fiziki şəxslərin sayında artım (19,8 faiz) müşahidə olunur. Kredit reyestrində hüquqi şəxslər haqqında məlumatlar 17,5 faiz, sahibkarlar üzrə isə 10,4 faiz artıb.
Reyestrdə olan zaminlər haqqında məlumatların sayı 1 035 622-dir.
Qeyd edək ki, Mərkəzləşdirilmiş Kredit Reyestri Xidməti 2005-ci ilin mart ayından fəaliyyət göstərir.
