Azərbaycan, Bakı, 9 oktyabr /Trend, müxbir Azad Həsənli/
Azərbaycanda çoxdəfəlik giriş vizalarının fəaliyyət müddətinin ləğv edilməsi təklif olunur. Trend-in məlumatına görə, bu dəyişikliklər Milli Məclisin müzakirəsinə tövsiyə edilən "Dövlət rüsumu haqqında" qanunda dəyişikliklər edilməsi barədə qanun layihəsində nəzərdə tutulub.
Hazırda çoxdəfəlik giriş vizaları 1 il müddətinə rəsmiləşdirilir. Dəyişikliklərə uyğun olaraq, Azərbaycanda, həmçinin 100 dollar ödəməklə əldə edilməsi mümkün olan ikidəfəlik vizanın ləğv edilməsi təklif edilir. Bununla da viza almaq istəyənlər yalnız birdəfəlik və ya çoxdəfəlik vizaların rəsmiləşdirilməsi üçün ərizə verə bilərlər.
Bununla belə, dəyişikliklər vizaların rəsmiləşdirilməsinə görə ödənilən dövlət rüsumunun məbləğinə təsir etməyib. Birdəfəlik vizanın rəsmiləşdirilməsinə görə dövlət rüsumu 50 dollar, çoxdəfəlik viza üçün isə 350 dollardır.
Bundan başqa, Azərbaycana qrup halında gələn əcnəbilərin hər birindən vizanın rəsmiləşdirilməsi və ya onun etibarlılıq müddətinin uzadılmasına görə dövlət rüsumunun ləğv olunması təklif edilir.
"Dövlət rüsumu haqqında" qanunda dəyişikliklər onun Azərbaycan Miqrasiya Məcəlləsinə uyğunlaşdırılması məqsədilə hazırlanıb.
