Təfərrüatlar əlavə olunub (ilk xəbər saat 13:03-də yayılıb)
Bakı. Ənvər Məmmədov - Trend:
Bank VTB-nin (Azərbaycan) azərbaycanlı abituriyent və tələbələrin təhsili üçün ayırdığı kreditin məbləği 30 min manatı və ya 1,92 milyon rublu ötməyəcək.
Trend-in məlumatına görə, bunu Bank VTB-nin (Azərbaycan) Təhlil, metodologiya və bank məhsullarının hazırlanması şöbəsinin müdiri Rasim Xammədov yeni məhsulun təqdimatında deyib.
Onun sözlərinə görə, kreditin məbləği 300 manatdan 30 min manatadək dəyişə bilər: "Tədris Rusiyada olduğuna görə biz krediti rublda veririk. Rublda kreditin məbləği 19 mindən 1,92 milyon rubladək təşkil edir. Kreditin müddəti 6-60 ay arasında dəyişir".
R.Xammədov qeyd edib ki, kredit semestr üçün tranş qismində və ya bütün tədris ili üçün verilə bilər, kredit üzrə faiz dərəcəsi isə valyutadan asılı olaraq dəyişəcək: "Manat kreditləri üzrə faiz dərəcələri illik 15 faiz, rubl kreditləri üzrə isə 19 faiz təşkil edəcək. Əgər tələbə yetkinlik yaşına çatmayıbsa, kredit onun yaxın qohumunun adına rəsmiləşdirilə bilər".