Azərbaycan bank tədris mərkəzinin direktorunun yaponiyalı məsləhətçisi Şidzuo Kato avqustda xarici yardımın cəlb edilməsi də daxil olmaqla, mərkəzin fəaliyyətinin genişləndirilməsinə dair təkliflərin hazırlanmasına və bu sahədə təhlillərin aparılmasına başlayıb.
Mərkəzdən Trend ə verilən məlumata görə, məsləhətçi Azərbaycanla əməkdaşlıqla bağlı tövsiyyələrini Yaponiya hökumətinə də təqdim edəcək.
Tövsiyyələrin təhlili və tərtib olunması üzrə son nəticələrin Ş.Katonun iki illik missiyasının başa çatmasına yaxın müddətdə əldə olunacağı gözlənilir. İlk tövsiyyələrin isə onun fəaliyyəti dövründə alınması planlaşdırılır.
Ş.Kato Yaponiya hökumətinin ayırdığı qrant hesabına maliyyələşdirilən layihə çərçivəsində xidmətlər göstərir.
Əvvəlcə onun yalnız Beynəlxalq Maliyyə Korporasiyası və Bp neft şirkətinin dəstəyi ilə həyata keçirilən, ABTM-in kiçik və orta müəssisələrə işgüzar xidmətlərin inkişafı layihəsi çərçivəsində istifadəsi planlaşdırılırdı.
Layihənin həyata keçirilməsi üzrə texniki məsləhətçi ABU Consult GmbH şirkətidir.
Layihə üzrə niyyət protokolu 2003-cü il mayın 8-də ABTM və BMF arasında, $677,25 min məbləğində maliyyələşdirmə haqqında qrant sazişi isə BVF, Bp və ABTM arasında 2004-cü ildə bağlanıb. Sazişə əsasən, BMF və Bp $270,45 min və müvafiq olaraq $267,3 min vəsait ayıracaq, ABTM isə $45 min dəyərində xidmət göstərəcək. Layihə 2004-cü il iyunun 1-dən etibarən həyata keçirilir.
