2005-ci ilin 8 ayı ərzində Azərbaycanda 81,6 mln ton müxtəlif yüklər daşınıb ki, bu da 2004-cü ilin analoji dövrünün göstəricisindən 7,6% çoxdur.
Azərbaycanın Nəqliyyat Nazirliyindən Trend ə verilən məlumata görə, daşımaların əsas hissəsi avtomobil nəqliyyatının payına düşür.
Bu nəqliyyat növü ilə 44,1 mln ton yük daşınıb ki, bu da 2004-cü ilin analoji dövrünün göstəricisindən 6,5% çoxdur. Həmçinin, sərnişin daşımalarının həcmi 4% artaraq 555 mln nəfər təşkil edib.
Nazirlikdə o da qeyd olunub ki, dəniz nəqliyyatı ilə 8,9 mln ton yük daşınıb, bu isə 2004-cü ilin analoji dövrü ilə müqayisədə 2,8% azdır.
Bu həcmin 73,8%-i neft və neft məhsullarının, 26,2% isə quru yüklərin payına düşüb.
Dəmiryol nəqliyyatı ilə 16 mln ton yük daşınıb ki, bu da 2004-cü ilin analoji dövrü ilə müqayisədə 19,2% çoxdur.
Daşımaların qalan hissəsi isə hava nəqliyyatı, magistral neft kəmərləri və digər nəqliyyat növləri ilə həyata keçirilib.