Bu gün Maliyyə naziri Əvəz Ələkbərov dünən gecə Bakıya səfərə gələn Küveytin Maliyyə naziri Bədir Əl-Hümeydinin rəhbərlik etdiyi nümayəndə heyəti ilə görüşübdür. Nazirlikdən verilən məlumata görə, görüşdə ikitərəfli qarşılıqlı iqtisadi münasibətlərin müxtəlif aspektləri müzakirə edilib. Tərəflər qarşılıqlı iqtisadi münasibətlərin daha da inkişaf etdirilməsi barədə razılığa gəlib və yaxın gələcəkdə konkret layihələrin həyata keçirilməsinin vacibliyini qeyd ediblər. Əməkdaşlıq çərçivəsində Küveyt fondunun maliyyə imkanlarından maksimum yararlanmaq, bu imkanların Azərbaycanda infrastrukturun bərpa və inkişafına yönəldilməsinin zəruriliyi vurğulanıb. Görüşdə "İnvestisiyaların qarşılıqlı qorunması", "İkiqat vergiqoymanın aradan qaldırılması", "Hökumətlərarası iqtisadi komissiyanın yaradılması" və s. bu kimi sazişlərin hazırlanması və imzalanmasının sürətləndirilməsi məsələlri ətrafında da fikir mübadiləsi aparılıbdır. Görüşün yekununda Ə.Ələkbərov Küveytə rəsmi səfərə dəvət edilib.
Qeyd edək ki, nümayəndə heyəti bu gün gecə Bakını tərk edəcək.
