Bolqarıstanın Azərbaycandakı səfirliyi "Azərbaycan Hava Yolları" Dövlət konserninin rəhbərliyi ilə Bakı ilə Sofiya arasında yeni təyyarə reysinin açılması ilə bağlı danışıqlar aparır. Bu barədə Trend ə Bolqarıstanın Azərbaycandakı səfirliyində bildirilib.
Aviasiya sahəsində iki ölkənin əməkdaşlığına dair müəyyən hüquqi baza vardır. Saziş Azərbaycan prezidentinin Bolqarıstana rəsmi səfəri zamanı imzalanmışdı. Səfirlikdə hesab olunur ki, iki ölkənin paytaxt şəhərləri arasında birbaşa təyyarə reyslərinin açılması turist axınının artırılmasına, ticari-iqtisadi münasibətlərin möhkəmləndirilməsi üçün böyük imkanlar yaradacaq.Təyyarə reysinin yeni ildə açılacağı gözlənilir.
Hazırda Azərbaycan və Bolqarıstan vətəndaşları Vena, Moskva və digər şəhərlərdən keçən çarter reysləri ilə uçur.
