Strastburqda Avropa Şurasının "çirkli" pulların yuyulması üzrə Moneyval ekspert qrupunun fevralın 3-dək davam edəcək plenar iclası öz işinə başlayıb. Bu barədə Trend ə AMB idarə heyətinin üzvü, "çirkli" pulların yuyulması ilə mübarizə üzrə idarələrarası işçi qrupunun rəhbəri Rüfət Aslanlı bildirib. Həmin iclasda Azərbaycandan AMB kredit təşkilatlarının fəaliyyətinə nəzarət Departamentində pulların yuyulması ilə mübarizə qrupunun rəisi Əliyar Məmmədyarov və ədliyyə Nazirliyinin nümayəndəsi, idarələrarası işçi qrupunun üzvü Fəxriyar Cabbarov iştirak edir.
Proqrama əsasən ölkələr pulların yuyulması və terrorizmin maliyyələşdirilməsi ilə mübarizə istiqamətində görülən işlər barədə məlumat verəcək. R.Aslanlının sözlərinə görə, Azərbaycan nümayəndə heyəti də ölkəmizdə bu istiqamətdəki irəliləyişdən danışacaq. Moneyval-ın iclası ildə üç dəfə keçirilir və hər bir ölkəyə görülən işlər barədə hesabat təqdim edilməsi üçün vaxt verilir.
Azərbaycan 2003-ci ildə Moneyval-ın yeni təlimatlarına əsasən qiymətləndirmədən keçmiş ilk dövlət olub. Onlar "40 + 8" (çirkli pulların yuyulmasına qarşı 40 standart və terrorizmin maliyyələşdirilməsinə qarşı 8 standart) prinsipi ilə hər bir FATF standartına uyğun olaraq ayrı-ayrı qiymətləndirmə kompleksi təqdim edir. Azərbaycan FATF standartlarına xeyli müvafiqdir və Moneyval-ın ölkəyə verdiyi qiymətləndirmə idarələrarası ekspert qrupu çərçivəsində aparılmış qiymətləndirmədən daha yüksək idi. Beynəlxalq ekspertlər tərəfindən ikinci qiymətləndirmənin bu il veriləcəyi gözlənilir.