Maliyyə nazirliyi ölkənin maliyyə orqanlarının tranzit xəzinə hesablarına xidmət üçün kommersiya banklarının hər il müsabiqə yolu ilə seçilməsi təcrübəsindən imtina edib. Trend in maliyyə naziri Əvəz Ələkbərova istinadən xəbər verdiyi kimi, 2006-cı ildə tender keçirilməyəcək. Lakin o, 2007-ci ildə bu məsələyə baxılmasının mümkünlüyünü istisna etməyib. "Biz yüksək keyfiyyətli bank xidmətində maraqlıyıq. Bu halda kapital, bank xidmətləri normativləri Milli bankın göstəricilərinə uyğun olmalıdır", - deyə nazir qeyd edib.
Bundan başqa Ə.Ələkbərov bank xidmətlərinə görə ödənişin azaldılmasının tərəfdarıdır ki, bu da büdcə xərclərinin azalmasına imkan verəcək. Bu istiqamətdə işlər davam etdiriləcək və gələcəkdə xəzinənin bank- agentlərinin siyahısının genişləndirilməsi planlaşdırıldığından nazir banklara bu prosesə hazırlaşmağı tövsiyə edir.
Özəl bankların xəzinə hesablarına xidmətə cəlb olunması ölkənin bank bazarında rəqabət mühitinin yaradılması çərçivəsində BMF-in tələblərindən biridir. 2005-ci ildə bu prosesi Azərbaycan Beynəlxalq bankı və Kapital bank həyata keçirirdi. 2005-ci il yanvarın 1-dən bu işə Texnika bank (Sumqayıt) cəlb olunub. Avqustun sonundan Maliyyə nazirliyinin bank-agentlərinin siyahısı 5-ə çatıb. Lənkəranda "Standart", Xaçmazda - Atabank, Gədəbəydə - Turanbank və Qəbələdə Nikoylbank xəzinə hesabları xidməti göstərir.