Beynəlxalq valyuta fondu (BVF) Azərbaycan hökumətinə makro iqtisadiyatın sabitliyinə dəstəyi nəzərdə tutan Stand-by gələcək əməkdaşlıq prooqramını təklif edir. Maliyyə naziri Əvəz Ələkbərov Trend ə bildirib ki, bu məsələ apreldə BVF missiyasının Bakıya səfəri zamanı müzakirə ediləcək.
"Biz Stand-by pooqramını həyata keçirməyə hazırıq, amma bununla BVF-in kredit ehtiyatlarını almağa yox. Bu proqram da ötən əməkdaşlıq proqramları kimi Fondun direktorlar Şurasında təsdiq olunacaq. Hələlik biz məsləhətləşmə əsasında işləmək istəyirik" -deyə nazir qeyd edib.
Bundan öncə Trend BVF-nin Bakı nümayəndəliyinin rəhbəri Bazel Zavoykoya istinadən bildirmişdi ki, ötən proqramlardan fərqli olaraq bu proqramla bağlı hökumət ilə kredit ehtiyatlarından yalnız fövqəladə vəziyyətlərdə istifadə olunmasına dair razılaşma əldə olunacaq. Belə hallardan biri neftin qiymətinin kəskin enməsi və bununla bağlı büdcə defisitinin qapanması üçün vəsait tələb olunması ola bilər.
"Bu, Fondun hökumətlə yeni əməkdaşlıq formasıdır, buna görə danışıqlar prosesi uzadılacaq. Düşünürəm ki, bu il ərzində danışıqlar başa çatacaq" -deyə B.Zavoyko qeyd edib. Ötən il həmin məsələnin razılaşdırılması mümkün olmayıb, çünki yoxsulluğun azaldılması və iqtisadi inkişaf proqramının (PRGF) gerçəkləşdirilməsi müddəti 2005-ci ilin iyulunda başa çatıb, sonra isə ölkədə seçkilər keçirilib.
