...

Türkiyə sahibkarları Bakıda toplaşacaq

Biznes və iqtisadiyyat xəbərləri Materials 15 Fevral 2006 11:34 (UTC +04:00)

Türkiyənin Azərbaycandakı biznes dairələrinin fəaliyyəti 2006-cı ilin martında Bakıda keçirilməsi planlaşdırılan, Türkiyənin Azərbaycandakı ticarət nümayəndəliyinin də qatılacağı iclasda diqqət mərkəzində olacaq.

Türkiyənin Azərbaycan səfirliyi yanında ticarət nümayəndəliyinin yeni rəhbəri Osman Özcanın Trend ə verdiyi məlumata görə, iclasda müzakirə olunacaq əsas məsələlərdən biri də Azərbaycan və Türkiyə arasında ticarət əməkdaşlığının fəallaşdırılması ilə bağlı olacaq.

O.Özcan hesab edir ki, "Türkiyə-Azərbaycan ticari-iqtisadi əlaqələrini əvvəlki səviyyəyə qaldırmaq həlli vacib olan məsələlərdən biridir". O, təəssüflə qeyd edib ki, 1999-cü ildə Türkiyə Azərbaycanın ticarət üzrə ən fəal tərəfdaşlarından biri olsa da, indi xarici ölkələrlə idxal üzrə ticarət əməliyyatlarında Rusiya, Sinqapur və Böyük Britaniyadan sonra 4-cü yerdə qərarlaşıb. İxrac əməliyyatlarına gəldikdə isə, Türkiyə yenə də liderlər sırasında deyil və İtaliya, Rusiya, Fransa və digər ölkələrdən geridə qalır.

Ticarət nümayəndəliyinin rəhbəri bildirib ki, belə ardıcıllıq hər iki ölkənin ticari-iqtisadi əməkdaşlıq sahəsində potensialını tam əks etdirmir. "Yaxın üç il ərzində Azərbaycanın ticarət üzrə tərəfdaşları arasında Türkiyənin 3-cü, 2-ci və nəhayət, 1-ci yeri tutması üçün mümkün olan hər şeyi etmək lazımdır" - deyə o qeyd edib.

O.Özcan bunu AB-nin xüsusilə gömrük rüsumları ilə bağlı Türkiyənin üzərinə qoyduğu müvafiq öhdəliklərlə əlaqələndirib. Türkiyə bu öhdəlikləri Azərbaycanla da ticarət əlaqələrində gözləməlidir. Bu, Azərbaycan bazarında Türkiyə mallarının dəyərinə təsir etməyə bilməz, yəni bu malların qiyməti məsələn, MDB ölkələrindən idxal olunan mallarla müqayisədə bahalaşır. O xatırladıb ki, Azərbaycanla MDB ölkələri arasında əlverişli ticarət rejimi mövcuddur ki, bu da Azərbaycanın həmin ölkələrlə ticarət əməliyyatlarını daha da intensivləşdirir.

Türk mallarının rəqabət qabiliyyətinə gəlincə, O.Özcan vurğulayıb ki, keyfiyyətinə görə türk malları Azərbaycana digər ölkələrdən idxal olunan mallardan heç də geridə qalmır. Əgər nə vaxtsa belə problem olubsa, o, dərhal həll olunub.

O bildirib ki, bu ilin mart-aprel aylarında Bakıda Türkiyə və Azərbaycanın işgüzar dairələrinin nümayəndələrinin iştirakı ilə iclasın keçirilməsi planlaşdırılır. Ticari-iqtisadi əməkdaşlıq sahəsində müxtəlif layihələrin müzakirə olunacağı bu iclasda iştirak etmək üçün Türkiyənin işgüzar dairələrinin nümayəndə heyəti Azərbaycana gələcək.

2006-cı ilin sonu 2007-ci ilin əvvəllərində Türkiyə-Azərbaycan hökumətlərarası iqtisadi və ticarət əməkdaşlığı komissiyasının növbəti iclasının keçirilməsi nəzərdə tutulur.

Qeyd edək ki, ticarət nümayəndəliyinin yeni rəhbəri O.Özcan Azərbaycana təyinatından əvvəl Türkiyə Nazirlər Kabinetinin xarici ticarət departamentinin rəhbəri olub. O, Bakıya 2005-ci ilin dekabrında gəlib.

Xəbər lenti

Xəbər lenti