Son illər ərzində Ukrayna ilə Azərbaycan arasında mal dövriyyəsi 1,5 dəfə artıb. "2006-cı il ərzində bu göstəricinin artırılmasını gözləməyin ciddi əsasları var. SSRİ dövründə ölkələr arasındakı mal dövriyyəsi hazırkı həcmdən 4 dəfə (1 mlrd. sovet rublundan artıq) çox idi, ötən ilin yekunlarına görə isə bu həcm $260 mln.təşkil edirdi" -deyə Ukraynanın Azərbaycandakı fövqəladə və səlahiyyətli səfiri Stepan Volkovetski Trend ə bildirib.
"Təkcə tarixi keçmiş deyil, həm də Asiya-Avropa energetika və nəqliyyat dəhlizindən istifadə, Azərbaycanın xüsusi neft və qaz ehtiyatları, eyni zamanda ölkənin Ukraynadan kənd təsərrüfatı və sənaye məhsullarının daşınması vasitəsilə tranzit imkanlarından da tamamilə istifadə olunmaması kimi daha ciddi əsaslar var" -deyə səfir qeyd edib.
Onun sözlərinə görə, müzakirə prosesində olan bir sıra digər layihələr də var ki, bu layihələrin gerçəkləşdirilməsi Azərbaycanla Ukrayna arasında mal dövriyyəsinin xeyli artırılmasına imkan verəcək. Bu layihələr Azərbaycan ərazisi ilə müxtəlif istiqamətlərdə enerji daşıyıcılarının tranziti ilə bağlıdır və "bizə maraqlıdır ki, bu, Ukraynadan da keçsin".
Onun sözlərinə görə, hələ 10 il öncə Azərbaycanın mağazalarında Ukrayna istehsalı olan kənd təsərrüfatı məhsulları hazırkı vaxtla müqayisədə daha çox idi. İndi Ukrayna mallarının keyfiyyəti daha da yaxşılaşdırılıb. "Ukrayna ölkəsini öz istehsalı olan kənd təsərrüfatı malları ilə 95% təmin edir və yalnız 5% idxal edir. Bu, ölkənin geniş imkanlarından xəbər verir və təbii ki, bu mallar Azərbaycana da gətirilə bilər"- deyə səfir öz qənaətini bildirib.
Bu gün Azərbaycandan Ukraynaya xüsusi vəziyyətlərdə və çox məhdud miqyasda neft məhsulları ixrac olunur. Hazırda "Asiya-Avropa" marşrutu ilə neft-qaz nəqlinin müxtəlif variantları müzakirə edilir. "Energetika təhlükəsizliyi nöqteyi-nəzərindən təkcə Ukraynada deyil, həm də bütövlükdə Avropada neft və qaza zərurət vardır" -deyə sonda səfir bildirib.
