Beynəlxalq Maliyyə Korporasiyası və İsveçrənin iqtisadi məsələlər üzrə dövlət katibliyi (Seco) Azərbaycanda lizinq fəaliyyətinin inkişafına texniki yardım layihəsinin gerçəkləşdirilməsi müddətinin 2007-ci ilin aprelinədək uzadılmasına dair qərar qəbul edib. Trend in xəbər verdiyi kimi, bu barədə martın 28-də layihə rəhbəri Elçin Əhmədov məlumat verib.
Onun sözlərinə görə, layihənin 2003-cü ilin mayında gerçəkləşdirilməyə başlamış birinci fazası apreldə başa çatacaq. Daha sonra layihə Seco-nun birinci faza üçün $1,3 mln həcmində ayırdığı vəsaitdən qənaət edilmiş məbləğ hesabına həyata keçiriləcək.
E.Əhmədov hesab edir ki, layihədə xüsusilə qanunvericiliyin təkmilləşdirilməsi, lizinq bazarında keyfiyyət və kəmiyyət göstəricilərinin yaxşılaşdırılması, lizinq assosiasiyasının yaradılması, maliyyə sektoru, sahibkarlar, dövlət orqanları nümayəndələri üçün xüsusi treninqlərin keçirilməsi ilə bağlı nəzərdə tutulmuş vəzifələr yerinə yetirilib. Bir il ərzində qanunvericiliyin mövcud vəziyyətini təhlil etmək və gələcəkdə bu qanunvericiliyin təkmilləşdirilməsi ilə bağlı təkliflər vermək nəzərdə tutulur.
Layihənin həyata keçirildiyi 2003-cü ildən bəri Mülki Məcəlləyə 18 dəyişiklik edilib. Həmin vaxtadək isə Azərbaycanda lizinq fəaliyyətini tənzimləyən hüquqi əsaslar 1994-cü ildən qüvvədə olan "Lizinq xidməti haqqında" Qanunla müəyyən edilirdi.
MDB məkanında Azərbaycan lizinq fəaliyyəti üçün imtiyazların öz əksini tapdığı qanunun qəbul edildiyi yeganə ölkə idi. Ancaq Vergi Məcəlləsi qüvvəyə mindikdən sonra bu imtiyazlar ləğv edildi ki, nəticədə də lizinq şirkətlərinin bank kreditlərinə tələbatı artdı. 2003-cü ildən başlayaraq hətta lizinqin predmeti olan avadanlıqların idxalını nəzərdə tutan bənd də Məcəllədən çıxarıldı.
Layihə eksperti Fuad Məmmədov qeyd edib ki, Azərbaycanda aqrolizinqin inkişafı ilə əlaqədar hökumət lizinqin predmeti olan bir qrup malları idxal zamanı ƏDV-dən azad edib. Həmçinin, lizinq ödənişləri də ƏDV-dən azad edilib.
Azərbaycanın lizinq şirkətlərinin üzləşdiyi əsas problemlər isə mühasibat uçotunun təkmilləşdirilməməsi, sürətləndirilmiş amortizasiyanın ləğv edilməsi, məhdud fəaliyyət sahəsidir.
E.Əhmədovun sözlərinə görə, digər ölkələrlə müqayisədə Azərbaycanda lizinq təkcə sahibkarlığını inkişafı üçün deyil, həm də istehlak və sosial məqsədlər üçün də nəzərdə tutula bilər.
