Dünya bankının ekspertləri Azərbaycanın məhkəmə sisteminin modernləşdirilməsi layihəsinin qiymətləndirilməsini başa çatdırıb və nəticələr baş nazir Artur Rəsizadəyə təqdim olunub. Bu barədə Trend ə bankın Bakı nümayəndəliyi menecerinin vəzifələrinin icraçısı Səidə Bağırlı məlumat verib.
Layihənin ümumi dəyəri $33,6 mln həcmində qiymətləndirilir. Bu layihədə DB-nin payı $20 mln olacaq ki, bu vəsait də Beynəlxalq İnkişaf Assosiasiyası tərəfindən ayrılacaq. BİA-nın şərtləri standartdır. Vəsait 10 illik güzəşt dövrü və 0,75%-lə 35 il müddətinə ayrılır.
DB nümayəndəliyindən Trend ə verilən məlumata görə, bank bu layihənin həyata keçirilməsi üçün $3 mln məbləğində qrant ayıracaq Yaponiya hökumətinə müraciət etməyə hazırlaşır. Qalan hissə hökumət tərəfindən ayrılacaq.
Layihə məhkəmə infrastrukturunun yaxşılaşdırılmasına, rayon məhkəmələri binalarının tikintisi və təmirinə, o cümlədən Ali Məhkəmə binasının təmirinə (ola bilsin ki, bu təmir ölkə hökuməti tərəfindən maliyyələşdiriləcək) yönəldilib. Həmçinin, bu binaların texniki təchizatı, xidmət göstərilməsini, məhkəmə qərarlarının dərcinin yaxşılaşdırılması, hakimlər üçün məlumatlar bazası yaratmaq üçün müasir informasiya və kommunikasiya texnologiyalarının tətbiqi, o cümlədən hakimlər üçün treninqlər keçirilməsi və s. nəzərdə tutulur.
