Azərbaycanın Nəqliyyat Nazirliyi Bakı şəhər İcra Hakimiyyəti ilə birgə 2030-cu ilədək paytaxtın nəqliyyat infrastrukturunun yükünün azaldılması üzrə proqramın işlənib hazırlanmasına başlayıb. Hazırda bütün işlər nazirlik və meriyanın öz gücü hesaına aparılır. Bu barədə Trend ə nəqliyyat nazirinin I müavini Musa Pənahov məlumat verib. Bu layihənin hazırlanması Azərbaycan prezidentinin "2006-2007-ci illərdə Bakı şəhərində nəqliyyat sisteminin təkmilləşdirilməsi haqqında" fərmanı çərçivəsində həyata keçirilir.
2000 - 2001-ci illərdə Central Consultant Inc. və Nippon Koei Co.,Ltd şirkətləri Yaponiya Beynəlxalq Əməkdaşlıq Agentliyi və Azərbaycan hökuməti arasında imzalanmış saziş çərçivəsində Bakı şəhərində nəqliyyat sisteminin təkmilləşdirilməsi üzrə araşdırma aparıb. Bu araşdırma zamanı 2020-ci ilədək Bakı şəhərinin nəqliyyat sisteminin inkişaf planı və prioritet layihələr üzrə texniki-iqtisadi əsaslandırmalar hazırlanıb. Ancaq M.Pənahovun qeyd etdiyi kimi, bu layihə köhnəlib, belə ki, o zaman aparlımış monitorinq ilə bu günkü vəziyyət üst-üstə düşmür.
Onun sözlərinə görə, hazırda Bakıda nəqliyyat vasitələrinin sayı yapon mütəxəssislərinin proqnozlaşdırdığından daha sürətlə artır.
