Dünya Bankının (DB) Bakı nümayəndəliyindən Trend ə verilən məlumata görə, mayın 11-dən 19-dək Bakıda DB-nın vəsaitləri hesabına maliyyələşdiriləcək üç layihə ilə əlaqədar rəsmi danışıqlar aparılacaq.
Bankın 2006-cı maliyyə ilində Azərbaycanın məhkəmə sisteminin modernləşdirilməsi və səhiyyə sistemində islahatların aparılması layihələri, eləcə də kənd təsərrüfatının inkişafı və kreditləşdirilməsi proqramının ikinci mərhələsi təsdiqlənəcək.
Məhkəmə sisteminə dair layihənin dəyəri 33,6 mln. dollar təşkil edir ki, bunun 20 mln. dolları DB tərəfindən ayrılacaq. Səhiyyə sahəsinə aid layihə 86 mln. dollar həcmində qiymətləndirilir ki, bunun 50 mln. dolları bankın payına düşür. Kənd təsərrüfatı layihəsi üçün isə DB iki maliyyə xətti açacaq. Beynəlxalq İnkişaf Assosiasiyasının (BİA) vəsaitlərindən 20 mln. dollar ayrılacaq. Bundan əlavə, BİA-nın sərtləşdirilmiş şərtlərilə isə 35 il müddətinə 10 illik güzəşt və libor-2% dərəcəsilə 8 mln. dolların verilməsi gözlənilir. Bu layihənin ümumi dəyəri təxminən 42 mln. dollardır.
Ümumilikdə Azərbaycan 2006-cı maliyyə ilində bankın güzəştli vəsaitlərindən 90 mln. dollar əldə edə bildər. Halbuki, əvvəl bu rəqəm 70 mln. dollar həcmində müəyyənləşdirilmişdir. Sonrakı illərdə Azərbaycanın BİA ehtiyyatlarına çıxışı məhdud olacaq, yəni güzəştli kreditlərin həcmi azaldılacaq.